حضورﷺ کی عبادت و خوف خدا

آپ ﷺ کی عبادت کا یہ عالم تھا کہ کثرت قیام شب کے سبب سے آپ ﷺ کے پاؤں مبارک پر ورم آگیا تھا۔ صحابہ کرام رضوان الله تعالى عليهم اجمعین نے عرض کیا کہ آپ ﷺ یہ تکلیف و محنت کیوں اٹھاتے ہیں حالانکہ خدا تعالیٰ نے آپ ﷺ کے سبب آپ کے اگلوں پچھلوں کے گناہ بخش دیئے ہیں آپﷺ نے جواب میں فرمایا: کیا میں شکر گزار بندہ نہ بنوں یعنی کیا میں اس بات کا شکر نہ کروں۔ حضرت عائشہ صدیقہ رضی اللہ تعالی عنہا فرماتی ہیں کہ ایک مرتبہ رسول الله ﷺ تمام رات نماز میں کھڑے رہے اور قرآن کی ایک ہی آیت بار بار پڑھتے رہے۔ اللہ کریم کے آخری نبی ﷺ کو نماز سے بہت محبت تھی، آپﷺ نے نماز کو اپنی آنکھوں کی ٹھنڈک فرمایا۔ جب نماز کا وقت ہوتا تو آقا کریم ﷺ حضرت بلال رضی اللہ عنہ سے فرماتے : *"قُم یا بِلَالُ فَاَرِحْنَا بِالصَّلَاۃِ" *اے بلال ! اٹھو اور ہمیں نماز سے راحت پہنچاؤ۔ (سیرت رسول عربیﷺ ص 363) *حضورﷺ کا انداز نماز:* حضرت حذیفہ بن الیمان رضی اللہ تعالی عنہ کا بیان ہے کہ میں نے رسول الله ﷺ کو رات کے ایک حصے میں نماز پڑھتے دیکھا آپ ﷺ یوں پڑھتے تھے: *"الله اکبر"* ( تین بار ) *"والْمُلْكِ وَالْجَبَرُوتِ وَ الْكِبْرِيَاءِ وَ الْعَظَمَةِ "*. پھر دُعائے استفتاح پڑھتے تھے، بعد ازاں آپ ﷺ نے (سورہ فاتحہ کے بعد ) سورۂ بقرہ پڑھ کر رکوع کیا۔ آپ ﷺ کا رکوع (طوالت میں ) مانند قیام کے تھا اور اس میں *"سُبْحَانَ رَبِّيَ الْعَظِيمِ"* پڑھتے تھے۔ پھر آپ ﷺ نے رکوع سے سر اٹھایا۔ آپﷺ کا قومہ مانند رکوع کے تھا۔ پھر آپ نے سجدہ کیا۔ آپﷺ کا سجدہ مانند قومہ کے تھا۔ آپﷺ سجدہ میں *"سُبْحَانَ رَبِّی الاعلی"* پڑھتے تھے۔ پھر آپ ﷺ نے سجدہ سے سر اٹھایا ، آپ ﷺ دو سجدوں کے درمیان مانند سجدہ کے بیٹھتے تھے اور *"ربِّ اغْفِرْ لِی، رَبِّ اغْفِرْ لِی"* پڑھتے تھے۔ اس طرح آپ ﷺ نے چار رکعتیں پڑھیں اور ان میں سُورَة بَقَرَة و آلِ عِمْرَان و نِسَاء اور مَائِدَة يَا أَنْعَام ختم کیں ۔ آپ ﷺکو خوف الہی کمال درجہ کا تھا۔ حضرت عبداللہ بن الشخیر روایت کرتے ہیں کہ ایک روز میں رسول ﷺ کی خدمت میں حاضر ہوا کیا دیکھتا ہوں کہ آپ ﷺ نماز پڑھ رہے ہیں اور رونے کے سبب سے آپ ﷺ کے شکم مبارک سے تابنے کی دیگ ( کے جوش ) کی مانند آواز آرہی ہے۔ (سیرت رسول عربیﷺ ص364)