حضور ﷺ کا عدل وانصاف

ایک روز رسول الله ﷺ مال غنیمت تقسیم فرمارہے تھے ایک شخص آیا اور آپﷺ پر جھک گیا۔ آپ ﷺ نے کھجور کی سوکھی شاخ سے جو آپ ﷺ کے دست مبارک میں تھی اسے ٹھوکا دیا جس سے اس کے منہ پر خراش آگئی۔ آپ ﷺ نے فرمایا کہ تم مجھ سے قصاص لے لو اس نے عرض کیا : يا رسول الله ﷺ میں نے معاف کر دیا۔ (سیرت رسول عربیﷺ ص 367) اللہ پاک نے عدل و انصاف قائم کرنے کی تاکید فرمائی ہے، جس کے متعلق قراٰنِ مجید میں مختلف مقامات پر ارشاد فرمایا: *"اِنَّ اللّٰهَ یَاْمُرُكُمْ اَنْ تُؤَدُّوا الْاَمٰنٰتِ اِلٰۤى اَهْلِهَاۙ-وَ اِذَا حَكَمْتُمْ بَیْنَ النَّاسِ اَنْ تَحْكُمُوْا بِالْعَدْلِؕ"* ترجَمۂ کنزالایمان: بے شک اللہ تمہیں حکم دیتا ہے کہ امانتیں جن کی ہیں انہیں سپرد کرو اور یہ کہ جب تم لوگوں میں فیصلہ کرو تو انصاف کے ساتھ فیصلہ کرو۔ (پارہ 5،النسآء:58) حضور ﷺ جنگ بدر کے لئے صف آرائی کر رہے تھے۔ حضرت سواد بن نغزئیہ انصاری صف سے آگے نکلے ہوئے تھے۔ آپ ﷺ نے ایک تیر کی لکڑی سے ان کے پیٹ کو ٹھوک دیا اور فرمایا: *"استو یا سواد"* اے سواد! برابر ہو جاؤ۔ اس پر حضرت سواد نے حضور ﷺ سے قصاص طلب کیا آپ ﷺ نے فوراً اپنا شکم مبارک ظاہر کر دیا اور فرمایا کہ قصاص لے لو۔ (سیرت رسول عربیﷺ 367) حضرت عمر فاروق رضی اللہُ عنہ فرماتے ہیں: میں تمہارے درمیان دو چیزیں چھوڑے جارہا ہوں جب تک تم ان کو خود پر لازم نہ کرلو ہرگز بھلائی نہ پاؤ گے (1)فیصلہ کرنے میں عدل وانصاف سے کام لینا۔ (2)تقسیم کرنے میں عدل وانصاف سے کام لینا۔ اور بے شک میں تمہیں ایک واضح اور سیدھے راستے پر چھوڑکر جا رہاہوں مگر یہ کہ قوم ٹیڑھی ہوئی تو وہ راستہ بھی ان کے سبب ٹیڑھا ہوجائے گا۔ (سیرت ابن جوزی ص275)