حضور ﷺ کا رعایا سے نرمی کرنا

سرکارِ نامدار، مدینے کے تاجدار ﷺ کا فرمانِ عالیشان ہے:چار(قسم کے) لوگوں کو اللہ عزوجل پسندنہیں فرماتا: قسم کھا کر مال بیچنے والا متکبر فقیر بوڑھا زانی اور ظالم حاکم۔ شہنشاہِ کون ومکان رحمتِ عالَمیان ﷺ جب اپنے کسی صحابی کو اپنے کچھ کاموں کے لیے والی ونگران بناکر بھیجتے تو اس سے فرماتے : خوشخبری دو متنفر نہ کرو اور آسانی کرو سختی وتنگی نہ کرو۔ (فیضان ریاض الصالحیں 655) روایت ہے حضرت ابو ہریرہ سے فرماتے ہیں فرمایا رسول اللہ ﷺ نے کہ جو مسلمانوں کا قاضی بننا طلب کرے حتّی کہ اسے پالے پھر اس کاانصاف اس کے ظلم پر غالب ہو تو اس کے لیے جنّت ہے اور جس کا ظلم اس کے انصاف پر غالب ہو اس کے لیے دوزخ ہے (مراۃ المناجیح حدیث 3736) روایت ہے انہی سے فرماتے ہیں میں نے رسول اﷲ ﷺ کو فرماتے سنا کہ نہیں ہے کوئی بندہ جسے اﷲ تعالٰی کسی رعیت کا والی بنائے پھر رعایا کی خیرخواہی سے حفاظت نہ کرے مگر وہ جنت کی خوشبو نہ پائے گا۔ (مراۃ المناجیح حدیث 3687) حضرت سیدنا ابو یعلیٰ معقل بن یسار رضی اللہ تعالٰی عنہ سے مروی ہےکہ میں نے رسول اللہﷺ کو یہ فرماتے ہوئے سنا: جب اللہ عزوجل اپنے کسی بندے کو رعایا پر حاکم بنائے اور وہ اس حال میں مرے کہ اپنی رعایا کو دھوکا دیتا ہوتو اللہ عزوجل اس پر جنت حرام فرما دے گا۔ ایک روایت میں ہے کہ وہ خیر خواہی کے ساتھ اُن کا خیال نہ رکھے تو وہ جنت کی خوشبو بھی نہ پاسکے گا ۔ (فیضان ریاض الصالحین حدیث 654)