حضور ﷺ کا مزاح(خوش طبعی)کرنا

حضرت انس رضی اللہ تعالٰی عنہ فرماتے ہیں، کہ کسی شخص نے حضور اقدس ﷺ سے درخواست کی، کوئی سواری کا جانور مجھے عطا فرما دیا جائے۔ حضور اقدس ﷺ نے فرمایا کہ ایک اونٹنی کا بچہ تم کو دیں گے، سائل نے عرض کیا کہ یا رسول اللہ ﷺ ! میں اونٹنی کے بچہ کا کیا کروں گا ؟ حضور اقدس ﷺ نے فرمایا کہ ہر اونٹ کسی اونٹنی کا بچہ ہوتا ہے۔ (شمائل ترمذی حدیث 225) حضرت حسن رضی اللہ تعالٰی عنہ فرماتے ہیں کہ حضور اقدس ﷺ کی خدمت میں ایک بوڑھی عورت حاضر ہوئی اور عرض کیا کہ یا رسول اللہ ﷺ دعا فرما دیجئے کہ اللہ تعالیٰ مجھے جنت میں داخل فرمادے۔ حضور اقدس ﷺ نے فرمایا کہ جنت میں بوڑھی عورت داخل نہیں ہوسکتی وہ عورت رونے لگی حضور اقدس ﷺ نے فرمایا اس سے کہہ دو کہ جنت میں بڑھاپے کی حالت میں داخل نہیں ہوگی بلکہ رب تعالیٰ سب اہل جنت عورتوں کو نوعمر کنواریاں بنادے گا۔ شمائل ترمذی حدیث227) حضرت ابو ہریرہ رضی اللہ عنہ سے روایت ہے کہ صحابہ کرام نے عرض کیا: یا رسول اللہﷺ ! آپ ہم سے مزاح فرماتے ہیں؟ آپ ﷺ نے فرمایا: میں (مزاح میں بھی) سچی بات کے سوا کچھ نہیں کہتا۔ (شمائل ترمذی حدیث 224)