حضورﷺ کا زیارت قبور کرنا

فرمانِ مصطفیٰ ﷺ ہے۔ *"كُنْتُ نَهَيْتُكُمْ عَنْ زِيَارَةِ الْقُبُورِفَزُوُرُوْهَافَإِنَّهَاتُزَهِّدُفِي الدُّنْيَا وَتُذَكِّرُ الْآخِرَةَ"* میں نے تمہیں قبروں کی زیارت سے منع کیا تھا ،اب ان کی زیارت کیا کرو کیونکہ اس سے دنیا میں بے رغبتی اور آخرت کی یاد پیدا ہوتی ہے۔ (ابن ماجہ حدیث 1571) اس حدیثِ پاک کے تحت حضرت علامہ عبد الرؤف مناوی علیہ رحمۃ اللہ القَوی فرماتے ہیں:جس شخص کا دل سخت ہوگیا ہو زیارتِ قبور اس کے لئے ایک عمدہ دوا ہے۔ (فیض القدیر ص71) حضرت فاطمہ خزاعیہ رضی اللہ تعالٰی عنہِا کا بیان ہے کہ میں ایک دن اُحد کے میدان سے گزر رہی تھی حضرت سیدنا حمزہ رضی اللہ تعالٰی عنہ کی قبر کے پاس پہنچ کر میں نے عرض کیا: *"اَلسَّلاَمُ عَلَیْکَ یَاعَمَّ رَسُوْلِ اللّٰہ"* “اےرسول اللہ ﷺکے چچا !آپ پر سلام ہو تو میرے کان میں یہ آواز آئی *"وَعَلَیْکِ السَّلَامُ وَرَحْمَۃُ اللّٰہ وَبَرَکَاتُہٗ"* یعنی تم پر بھی سلامتی اور اللہ کی رحمت اور برکتیں ہوں۔ سرکارِ مدینہ ﷺ شہدائے احد کی مبارک قبروں کی زیارت کو تشریف لے جاتے اور ان کے لئےسلام فرماتے:*"سَلٰمٌ عَلَیۡکُمۡ بِمَا صَبَرْتُمْ فَنِعْمَ عُقْبَی الدَّارِ"* (تم پر سلامتی ہو کیونکہ تم نے صبرکیا تو آخرت کا اچھا انجام کیا ہی خوب ہے) حضراتِ ابوبکر و عمر اور عثمانِ غنی رضوان اللہ تعالٰی علیہم اجمعین کا بھی یہی معمول تھا۔ (در منشور ص 640) سرکارِ نامدارﷺ کا فرمانِ مشکبار ہے: جوشخص ہر جمعہ کو اپنے والدین یا ان میں سے ایک کی قبرکی زیارت کرے، اُس کی مغفرت کردی جائے گی اور اُسے ماں باپ کے ساتھ بھلائی کرنے والا لکھ دیا جائےگا۔ (شعب الایمان،ج6، ص201، حدیث:7901) یہاں جمعہ سے مرادیا تو جمعہ کا دن ہے یا پورا ہفتہ، بہتر ہے کہ ہر جُمُعَہ کے دن والدین کی قبورکی زیارت کیا کرے،اگر وہاں حاضری میسرنہ ہوتو ہر جمعہ کوان کے لئےایصالِ ثواب کیا کرے۔ (مراٰۃ المناجیح،ج2،ص526) مدینے کے سلطان ﷺ کافرمانِ شفاعت نشان ہے: جو شخص قبرِستان میں جاکر سورۃفاتِحہ، سورۃاِخلاص اور سورۃتکاثُر پڑھے، پھر یہ کہے: اے اللہ! میں نے جو کچھ قراٰن پڑھا اس کا ثواب اِس قبرستان کے مومن مردوں اور عورَتوں کو پہنچا تو وہ سب (قِیامت کے دن) اس (ایصالِ ثواب کرنے والے) کی شفاعت کریں گے۔ (شرح الصدور ص311)