حضور ﷺکی بچوں پر شفقت و رحمت

ایک دیہاتی رسول الله ﷺکے پاس آکر کہنے لگا کہ آپ بچوں کو چومتے ہیں ہم نہیں چومتے ۔ آپﷺ نے فرمایا: جب اللہ تمہارے دل سےرحمت نکال لے تو میں کیا کر سکتا ہوں ۔ حضرت جابر بن سمرہ رضی اللہ تعالٰی عنہ بیان کرتے ہیں کہ میں نے رسول اللہ ﷺکے پیچھے نماز ظہر پڑھی نماز سے فارغ ہو کر آپﷺ اپنے دولت خانہ کو تشریف لے گئے ، میں آپ ﷺ کے ساتھ ہولیا، راستے میں بچے ملے ، آپ ﷺ نے ہر ایک کے رخساروں پر دست شفقت پھیرا اور میرے رخساروں پر بھی پھیرا، میں نے آپﷺ کے دست مبارک کی ٹھنڈک یا خوشبو ایسی پائی کہ گویا آپ ﷺ نے اپنا ہاتھ مبارک عطار کےصندوقچہ میں سے نکالا تھا۔ جب آپ ﷺ کا گزر بچوں کے پاس سے ہوتا تو ان کو سلام کیا کرتے تھے۔ حضرت ابو رافع بن عمر و غفاری کے چچا بیان کرتے ہیں کہ میں لڑکپن میں انصار کے نخلستان میں جاتا اور درختوں پر ڈھیلے مارتا، مجھے رسول الله ﷺ کی خدمت میں لے گئے ،آپ ﷺ نے پوچھا لڑکے ! تو درختوں پر ڈھیلے کیوں مارتا ہے؟ میں نے عرض کی: کھجوریں کھانے کے لئے ۔ آپ ﷺ نے فرمایا: ڈھیلے نہ مارا کرو کھجوریں جو نیچے گری ہوں کھا لیا کرو۔ پھر آپ ﷺ نے میرے سر پر دست شفقت پھیرا اور یوں دعا فرمائی: خدایا ! اس کا پیٹ بھر دے۔ حضرت ابو ہریرہ رضی اللہ تعالی عنہ کا بیان ہے کہ فصل کا کوئی پھل پکتا تو لوگ اسے رسول اللہ ﷺ کی خدمت میں لایا کرتے ، آپ ﷺ اس پر یہ دعا پڑھا کرتے: "خدایا! ہمیں اپنے مدینہ میں اور اپنے پھل میں اور اپنے مد میں اور اپنے صاع میں (مد اور صاع دو پیمانے ہیں) برکت دے۔ اس دعا کے بعد بچے جو حاضر خدمت ہوا کرتے ان میں سے سب سے چھوٹے کو حضورﷺوہ پھل عنایت فرماتے۔ (سیرت رسول عربیﷺ ص؛327)