رسول کریم ﷺکا مصافحہ کرنا

ایوب ابن بشیر عنزہ کے ایک شخص سے روایت فرماتے ہیں کہ میں نے ابوذر سے کہا۔۔۔ ، کیا نبی جب تم ان سے ملتے تو تم سے مصافحہ کرتے تھے ؟فرمایا کبھی ایسا نہ ہوا کہ میں آپ ﷺ سے ملا ہوں اور مجھ سے مصافحہ نہ کیا حضور ﷺ نے مجھے ایک دن بلایا میں اپنے گھر میں نہ تھا پھر جب میں آیا تو مجھے خبر دی گئی تو میں حضور ﷺ کے پاس آیا آپ ﷺ ایک تخت پر تھے مجھے لپٹا لیا تو یہ بہت اچھا بہت اچھا ہوا (مراة المناجیح، 4683) جب دو دوست آپس میں ملتے، مصافحہ کرتے اور نبی ﷺ پر درود پاک پڑھتے ہیں تو ان دونوں کے جدا ہونے سے پہلے پہلے دونوں کے اگلے پچھلے گناہ بخش دیئے جاتے ہیں۔ (شعب الایمان،ج 6،ص471، حدیث: 8944) روایت ہے عطاء خراسانی سے کہ رسول الله ﷺ نے فرمایا آپس میں مصافحہ کرو کینہ جاتا رہے گا اور آپس میں ہدیے تحفے دو محبت کرنے لگو گے اور دشمنی جاتی رہے گی۔ (مراۃالمناجیح حدیث 4693) نبیِّ کریم ﷺ نے فرمایا : مصافحہ کیا کرو کینہ دور ہوگا ، تحفہ دیا کرو محبت بڑھے گی اور بُغْض دور ہوگا۔ (موطا امام مالک حدیث 1731) حکیمُ الاُمَّت حضر ت مفتی احمد یار خان رحمَۃ اللہ ِ علیہ اِس حدیثِ پاک کے تحت فرماتے ہیں : یہ عمل بہت ہی مجرّب(یعنی تجربہ شدہ) ہے جس سے مصافحہ کرتے رہو اس سے دشمنی نہیں ہوتی۔ اگر اتفاقاً کبھی ہو بھی جائے تو اس کی برکت سے ٹھہرتی نہیں۔ روایت ہے حضرت انس سے کہ رسول اللہ ﷺ جب کسی شخص سے مصافحہ کرتے تھے تو اپنا ہاتھ نہ کھینچتے حتی کہ وہ ہی اپنا ہاتھ کھینچتا تھا، اور آپ ﷺ اپنا منہ اس کے منہ سے نہیں پھیرتے تھے حتی کہ وہ ہی اپنا منہ حضورﷺ کے چہرے سے پھیرتا اور حضورﷺ کو کبھی نہ دیکھا گیا کہ حضورﷺ اپنے ہم نشین کے سامنے گھٹنے پھیلا کر بیٹھے ہوں۔ (مراۃ المناجیح حدیث 5824)