حضور ﷺ کی پاکیزگی

حضرت جابر رضی اللہ عنہ فرماتے ہیں کہ ایک شخص نبی پاک ﷺ کے پاس اس حال میں آیا کہ اس کے بال بکھرے ہوۓ تھے ۔ نبی پاک ﷺ نے جب اسے دیکھا تو آپ ﷺ نے یہ فرمایا :کیا اسے کوئ ایسی چیز نہیں ملی جس سے یہ اپنے بالوں کو سنوارلیتا۔ بالوں کو سنوارنا ، ان کی صفائ ستھرائ کا خیال کرنا یہ بھی صفائ و پاکیزگی کا حصہ ہے۔ اس حدیث پاک سے پتا چلا نبی پاک ﷺ بکھرے بالوں کو پسند نہیں فرماتے تھے ۔ بلکہ بالوں کا سنورا ہونا یہ سرکار ﷺ کو پسند تھا۔ (سنن ابی داود حدیث 4062) *گھر کی صفائی:* حضور نبی رحمت ﷺ نے فرمایا:اللہ تعالٰی پاک ہے، پاکی پسند فرماتا ہے،ستھرا ہے، ستھرا پن پسندفرماتا ہے لہٰذا تم اپنے صحن صاف رکھو اوریہودسے مشابہت نہ کرو۔ (ترمذی،ج4،ص325،حدیث:2808) *لباس کی پاکیزگی:* جو لباس تم پہنتے ہو اسے صاف ستھرا رکھو اور اپنی سواریوں کی دیکھ بھال کیا کرو اور تمہاری ظاہری شکل و صورت ایسی صاف ستھری ہو کہ جب لوگوں میں جاؤ تو وہ تمہاری عزت کریں۔ (جامع صغیر، ص22، حدیث: 257) *کھانے کے بعدکی صفائی:* *"عَنْ عَبْدِ اللَّهِ بْنِ عَبَّاسٍ، قَالَ :قَالَ رَسُولُ اللَّهِ صلى الله عليه وسلم : "إِذَا أَكَلْتُمْ شَيْئًا فَتَمَضْمَضُوا ،فَإِنَّ ذَلِكَ أَنْقَى لِفِيكُمْ وَأَطْيَبُ"* ترجمہ : حضرت عبداللہ بن عباس رضی اللہ عنہ سے روایت ہے کہ رسول اللہ ﷺ نے فرمایا: "جب تم کچھ کھاؤ تو کلی کرو، کیونکہ یہ منہ کی صفائی اور تازگی کے لیے بہتر ہے۔ (سنن ابن ماجہ، حدیث 404)