نباتات پر شفقت مصطفٰی ﷺ

سرکارِ عالی وقار ، مکی مدنی تاجدار ﷺ اس ستون کے ساتھ ٹیک لگا کر خطبہ دیا کرتے تھے۔ پھر آپ ﷺ کے لئے لکڑی کا منبر بنا دیا گیا ، جمعہ کا دِن تھا ، سرکار اعظم ، نورمجسم ﷺ مسجد میں تشریف لائے ، منبر پر تشریف فرما ہوئے تو اچانک کسی کے رونے کی آواز آنے لگی (جیسے کوئی بچہ بڑے دَرْد سے بلبلا کر رو رہا ہو ) ، دیکھا گیا تو وہی کھجور کے سُوکھے تنے کا سُتون جس کے ساتھ ٹیک لگا کر دوجہاں کے تاجدار ﷺ خطبہ دیا کرتے تھے ، فراقِ مصطفےٰ میں پھُوٹ پھُوٹ کر رو رہا تھا ، رحمتِ دوجہان ، مکی مدنی سلطان ﷺ سے اُس کا رونا دیکھا نہ گیا ، آپ ﷺ منبر مبارک سے نیچے اُترے ، اس سُتُون کے قریب تشریف لائے ، اس پر دستِ شفقت رکھا اوربُخاری شریف میں الفاظ ہیں کہ رحمتِ عالَم ، نور مجسم ﷺ نے اس سُتون کو چُپ کروانے کے لئے سینے سے لگا لیا ، اب کیا تھا ، جیسے روتے ہوئے بچے کو ماں سینے سے لگائے تو وہ ہلکی ہلکی سسکیاں لینے لگتا ہے ، وہ ستون بھی ایسے ہی سسکیاں لینے لگا ، یہاں تک کہ چُپ ہو گیا۔ (صحیح بخاری) حضور ﷺ نےفرمایا جس نے کوئی درخت لگایا اور اُس کی حفاظت اور دیکھ بھال پر صبر کیا یہاں تک کہ وہ پھل دینے لگا تو اُس میں سے کھایا جانے والا ہر پھل اللہ پاک کے نزدیک(اس لگانے والے) کے لیے صدقہ ہے۔ ایک اور روایت میں ہے کہ آقا کریم ﷺ نے فرمایا جس نے کسی ظلم و زیادتی کے بغیر کوئی گھر بنایا یا ظلم و زیادتی کے بغیر کوئی درخت اگایا ، جب تک اللہ پاک کی مخلوق میں سے کوئی ایک بھی اس میں سے نفع اٹھاتا رہے گا تو اس (لگانے والے) کو ثواب ملتا رہے گا۔ (مسند امام احمد)