پیارے نبی ﷺ کا سُر مہ لگانا

روایت ہے حضرت ابن عباس سے کہ نبی پاک ﷺ نے فرمایا کہ اثمد سرما لگایا کرو۔ کہ وہ نگاہ میں جلا دیتا ہے اور بال اگاتا ہے۔ انہوں نے گمان کیا کہ نبی کریم ﷺ کی سرمہ دانی تھی جس میں سے ہر رات سرمہ لگاتے تھے تین سلائیاں اس آنکھ میں اور تین دوسری میں۔ (مراۃالمناجیح حدیث 4472) *سرمہ لگانے کا طریقہ:* سرمہ استعمال کرنے کے 3منقول طریقوں کا خلاصہ پیشِ خدمت ہے: (1):کبھی دونوں آنکھوں میں 3، 3سلائیاں، (2):کبھی سیدھی آنکھ میں 3سلائیاں اور اُلٹی آنکھ میں 2، (3):تو کبھی دونوں آنکھوں میں 2،2،اور پھر آخر میں ایک سلائی کو سرمے والی کر کے اُسی کو باری باری دونوں آنکھوں میں لگائیےاس طرح کرنے سے ان شاءاللہ الکریْم! تینوں پر عمل ہوتا رہے گا۔ اے عاشقانِ رسول !تکریم کے جتنے بھی کام ہوتے سب ہمارے پیارے آقا ﷺ سیدھی جانب سے شروع کیا کرتے، لہٰذا پہلے سیدھی آنکھ میں سرمہ لگائیے پھر اُلٹی میں۔ (شعب الایمان ،219) روایت ہے حضرت ابن عباس سے فرماتے ہیں رسول الله ﷺ نے فرمایا سفیدکپڑے پہنو کیونکہ یہ تمہارے تمام کپڑوں سے بہتر ہیں اور اسی میں اپنے مُردوں کو کفن دو اور بہتر سرمہ اثمد ہے کہ وہ بال اگاتا ہے نگاہ تیزکرتا ہے۔ (مراۃ المناجیح حدیث 1638) *"عجب نہیں کہ لکھا لوح کا نظر آئے! " "جو نقشِ پا کا لگاؤں غبار آنکھوں میں"*