رسول اقدس ﷺ کا سینہ مبارک

حجة الاسلام حضرت امام ابو حامد محمد بن محمد بن محمد غزالی رحمۃ اللہ علیہ لکھتے ہیں: ہم سب کے پیارے نبی ﷺکا مبارک سینہ گشادہ (یعنی چوڑا) تھا۔ بعض حصے کا گوشت بعض پر چڑھا ہوا نہیں تھا بلکہ شیشے کی مانند برابر اور چاند کی طرح سفید تھا۔ آپ ﷺ کے مبارک سینہ کے اوپر والے حصے سے ناف شریف تک باریک دھار کی طرح بالوں کا ایک خط ملا ہوا تھا یعنی بالوں کی لکیر سی بنی ہوئی تھی اور اس کے علاوہ آپ ﷺ کے پاکیزہ سینے اور پیٹ مبارک پر کوئی بال نہیں تھا۔ (احیاء العلوم 470) علامہ اسماعیل نبہانی رحمتہ اللہ علیہ فرماتے ہیں: روایت میں ہے، آپ ﷺ کا مبارک پیٹ اور سینہ مبارک برابر تھے۔ نہ تو پیٹ شریف سینہ پاک سے اور نہ سینہ پاک پیٹ شریف سے بلند تھا۔ حضرت بی بی اُم ہانی رضی اللہ عنہا فرماتی ہیں کہ میں نے رسول اللہ ﷺ کے مبارک پیٹ کو دیکھا گویا کاغذ ہیں ایک دوسرے پر رکھے ہوئے اور تہہ کیے ہوئے۔ (جواہر البحار 263) * "کل جہاں ملک اور جو کی روٹی غذا" "اس شکم کی قناعت پہ لاکھوں سلام"*